Tabiatni rang-barang o’simliklar dunyosisiz tasavvur etib bo’lmasligini siz tabiatshunoslik va 5-sinf botanika darslaridan yaxshi bilasiz. O’simliklar qanchalik ko’p bo’lishiga qaramay, o’ziga xos tarzda turli sharoitlarda o’sishga moslashgan. Tabiatda o’simlik uchramaydigan joy juda kam topiladi. Siz ularni hovlingizda, maktab hovlisida, dalalarda, cho’l, adir va baland tog’larda ko’plab uchratasiz. G’o’za, poliz va sabzavot ekinlari orasida ham turli-tuman o’tlarni, shu jumladan, “begona o’t” deb ataladigan o’simliklarni bir necha bor uchratgansiz.